Հուլիսի 23-24-ին Սյունիքի մարզի Կոռնիձոր սահմանապահ գյուղում կազմակերպում ենք Վարդավառի ամենամյա ժողովրդական տոնակատարությունը:

Սահմանը մեր կարիքն ունի

2020թ. պատերազմից հետո հատկապես Սյունիքի մարզի մի շարք համայնքներ դարձան սահմանամերձ: Այս փաստը բարոյահոգեբանական և սոցիալ-տնտեսական բացասական ազդեցություն թողեց համայնքների բնակիչների վրա: Էական և կտրուկ քայլեր չձեռնարկելու դեպքում հուսալքության ալիքը կարող է հանգեցնել այս համայնքներից արտագաղթի բարձր մակարդակի:

Ու չնայած այն հանգամանքին, որ Կոռնիձորը երեք կողմից սահմանամերձ է, մեզ հաջողվեց 2021թ․ Վարդավառին սահմանը անհավանական տոն դարձնել։ 2 օր ու գիշեր սահմանը թնդում էր, թնդում էր ուրախությունից, երգուպարից, միասնական ուժից։

Բոլորս միասին տոնելով՝ կարող ենք փոխել տրամադրությունը սահմանին։

Նվիրաբերե՛ք, դարձե՛ք այս ցնծության մի մասը ու հիշե՛ք, որ սահմանը մեզ սպասում է։

Վարդավառը միայն ջրոցին չէ

Վարդավառը հայկական ավանդական տոների շարքում ամենաուրախներից մեկն է։ Այժմ այն առավելապես ասոցացվում է ջրային խաղերի հետ, սակայն Վարդավառի տոնը հնում նշվում էր ժողովրդական մեծ հանդիսություններով ու ծիսակարգով։ Մենք որոշեցինք այդ հանդիսությունների վերականգնումը սկսել հենց սահմանամերձ գյուղերից։

Մշակութային զարթոնքից մինչև տնտեսական լուծումներ

Վարդավառի տոնակատարությունը լուծում է առաջարկում մի քանի ուղղություններով:

• Սահմանամերձ համայնքներում բարոյահոգեբանական մթնոլորտի բարձրացում և բնակիչների քաջալերում: Ընդ որում, ոչ միայն Կոռնիձորի բնակիչների շրջանում, այլ նաև բոլոր սահմանամերձ բնակավայրերում ապրողների, քանի որ միջոցառումը լուսաբանվում է ինչպես լրատվամիջոցներով, այնպես էլ սոցիալական տարբեր հարթակներում:

• Սահմանամերձ բնակավայրերում իրականացվող էթնոմշակութային զանգվածային միջոցառումները զգալիորեն բարձրացնում են հայրենաճանաչողության մակարդակը: Բացի այդ, հյուրերի մոտ կոտրվում է այն կարծրատիպը, թե սահման այցելելը վտանգավոր է:

• Միջոցառումն ունի ազգային մշակութային արժեքների պահպանման, գեղագիտական ճաշակի բարձրացման և կրթական բաղադրիչներ: Միջոցառման մշակութային մասն ապահովելու են բացառապես պրոֆեսիոնալ արվեստագետներն, ազգագրագետները, երաժիշտները:

• Երկօրյա միջոցառման ընթացքում գյուղի բնակիչները տարբեր ծառայությունների մատուցման արդյունքում կունենան էական լրացուցիչ եկամուտներ: Մեր կանխատեսումներով, նաև հաշվի առնելով 2021թ. միջոցառման վիճակագրությունը, գիշերակացի, սննդի ծառայություններից և գյուղմթերքի վաճառքից Կոռնիձորի բնակիչների ստացվելիք եկամուտները գերազանցելու են միջոցառման բյուջեն:

• Միջոցառումը մեծ կապեր է ստեղծում գյուղի բնակիչների և հյուրերի միջև, որը կարող է հետագա համագործակցությունների հիմք հանդիսանալ:

Աջակցե՛ք, որ տոնը սահմանին թնդա։

Ազգային պարեր, համերգ, խարույկ, ջրոցի․․․

Հուլիսի 23-24-ի երկօրյա միջոցառման ծրագրում՝ համերգ, պարեր, ուխտագնացություն, շրջերթ գյուղով, նախավարդավառյան խարույկի երեկո, լարախաղաց, ժողովրդական խաղեր, վարդավառյան ծիսախաղեր, խնդումի ծես, խաչբուռ, հացաթխում, կոռնիձորյան բարիքների վաճառք:

Մենք կամավորներ ենք

«Դեպի Համայնք» համայնքային զարգացման ՀԿ-ը ստեղծվել է 2019թ.՝ մի խումբ կամավորների կողմից: Կազմակերպության նպատակն է՝ նպաստել համայնքների իրատեսական զարգացմանը՝ ստեղծելով պայմաններ համայնքների ներուժի բացահայտման և առավելագույն իրագործման համար։

2021թ․ «Դեպի համայնք» և «Կէան» կրթամշակութային կենտրոն հասարակական կազմակերպությունները կազմակերպեցին Կոռնիձորում Վարդավառի ժողովրդական տոնակատարությունը: Ըստ տարբեր մասնագետների՝ այն համարվեց հաջողված տոնակատարություն մոտ 1500 հյուրերով։ Գյուղն ու հարակից բնակավայրերը անհամբերությամբ սպասում են այս տարվա ավելի զանգվածային միջոցառմանը։

Մեր սիրելի գործընկերները

Մենք ունենք շատ պրոֆեսիոնալ ու նվիրված գործընկերներ, որոնց հետ միասին հաջողելու ենք այս կարևոր միջոցառումը։

Այս պահին իրենց մասնակցությունը հաստատել են․

• «Մարզերի երեխաները մարզերում» ՀԿ Սյունիքի մասնաճյուղը,
• «Կոռնիձոր» հիմնադրամը,
• «Մասունք» ազգագրական երգ-պարի համույթը,
• «Բարձունք» գիտակրթական-ռազմավարական ՀԿ-ը,
• «Վարը վարենկ» նախաձեռնությունը։

Գործընկերների ցանկն օրեցօր ընդլայնվում է, որովհետև մենք կամավորներ ենք, մեր նպատակն է Վարդավառի տոնակատարությունը Կոռնիձորում դարձնել պրոֆեսիոնալ էթնոմշակութային ուրախ ու հնարավորինս զանգվածային միջոցառում։

Համագործակցության, մասնակցության և այլ հարցերի դեպքում կարող եք զանգահարել 091431654 հեռախոսահամարով կամ գրել inbox@tocommunity.am էլեկտրոնային հասցեին։

Նվիրաբերե՛ք, միացե՛ք, մասնակցե՛ք, որպեսզի տոնելով փոխենք տրամադրությունը սահմանին։

Մեզ սպասում են․․․

Նախագծի բյուջեին ծանոթացեք այստեղ։

Այս նախագիծն աջակցում է`

Կայուն Զարգացման Նպատակներին

«Ապագա Հայկանանը» Նպատակներին