Հարգելի՛ բարեկամներ, տեղեկացնում ենք, որ ապրիլի 23-ին «Փոքրիկ Իշխան» կրթահամալիրում տեղի ունեցավ ուսումնական լսարանի բացում՝ ի հիշատակ 44-օրյա պատերազմի հերոս, կրթահամալիրի սան Արթուր Ասատրյանի։ Միջոցառմանն առաջին անգամ ներկայացվեց նաև լուսանկարիչ Հակոբ Պողոսյանի՝ Արցախյան ազատամարտի և մերօրյա հերոսների լուսանկարների շարքը, որը կազմակերպվել էր Հայ Օգնության Միության հետ համատեղ:

Միջոցառմանը ներկա էին կրթահամալիրի ընկերները, գործընկերները:

Բացման ելույթի իր խոսքում կրթահամալիրի տնօրեն Մարիա Խախամյանը նշեց, թե որքան կարևոր և պատասխանատու է եղել գաղափարի իրագործման ուղին, ներկայացրեց «Կրթված սերունդը՝ հզոր հայրենիքի երաշխիք» նախագծի նպատակը․ կարևոր ու բացառիկ նախաձեռնություն՝ ուղղված ժամանակի պահանջներից բխող գաղափարը կյանքի կոչելուն և միտված՝ համախմբելու ողջ կրթական համայնքը։

Միջոցառմանը ներկա Արթուրի ուսուցիչները, դասընկերներն ու զինակից ընկերը հյուրերի հետ կիսվեցին ամենավառ ու բարի հիշողություններով, դպրոցական ամենապայծառ ու լուսավոր օրերի մասին տեսանյութերով, ընթերցվեց նաև Արթուրի՝ բանակում գրված և մինչև այսօր ընկերոջ մոտ խնամքով պահ տված նամակը սիրելի կրթահամալիրին։

Արթուրի հիշատակի անկյունում, խնամքով դասավորված են նրա իրերը, պարգևները, սիրելի կրթահամալիրին գրված նամակը, հուշ-մատյանը՝ գրառումների համար։

Տեղեկացնենք, որ լսարանը հիմնովին վերանորոգվել է, կահավորվել անհրաժեշտ ուսումնական, դիդակտիկ պարագաներով և ներ է դրվել ինտերակտիվ լազերային հրաձգարանը՝ համապատասխան համակարգչային տեխնիկայով։ Միջոցառման ավարտին՝ 12-րդ դասարանի աշակերտները իրականացրին լազերային հրաձգարանի փորձարկում, ներկայացրին ցուցադրական վարժանքներ։

Մեր խորին շնորհակալությունն ենք հայտնում այն բոլոր սրտացավ մարդկանց, ովքեր առանց վարանելու կանգնեցին մեր կողքին ու դարձան այս նախագծի գաղափարակիցն ու աջակիցը:

Շնորհակալություն ռեԱրմենիա կազմակերպությանը՝ վստահության և սերտ համագործակցության համար։

Հանուն հզոր հայրենիքի՝ այսօր պիտի՛ կրթենք բանիմաց, պատասխանատու և հայրենասեր սերունդ։

Հարգելի՛ բարեկամներ,

   Սիրով տեղեկացնում ենք, որ «Կրթված սերունդը՝ հզոր հայրենիքի երաշխիք» նախագիծը ավարտեց իր արշավը՝ այդպիսով ժամանակից շուտ հավաքելով նախատեսված ողջ գումարը։

 Սա պարզապես կրթահամալիրի հերթական նախագծերից չէ․ այն առավել կարևոր, բացառիկ նախաձեռնություն է՝ ուղղված ժամանակի պահանջներից բխող գաղափարի իրականացմանը, որը միտված է համախմբելու ողջ կրթական համայնքը։ Շնորհակալություն բոլորի՜դ ծրագրի աջակիցը դառնալու համար։

  Սիրելի՛ բարեկամներ, վստահեցնում ենք, որ հանգանակված ամեն մի լումա ծառայելու է իր նպատակին, ու այս ազգանպաստ գաղափարը իրականություն է դառնալու՝ օրինակ ծառայելով այլ կրթօջախներին։

 Ընթացս կտեղեկացնենք մեր կատարած աշխատանքների մասին, իսկ լսարանի վերաբացումը կկայանա արդեն ամսվա վերջում։

  Վստա՛հ ենք, որ հանուն հզոր հայրենիքի՝ այսօր կրթելու ենք բանիմաց, պատասխանատու և հայրենասեր սերունդ։

Սիրով տեղեկացնում ենք, որ մեր նախագծի արշավը մոտենում է ավարտին, և մենք նախատեսվածից շուտ կարողացանք հավաքել պահանջվող գումարը։ Դրամահավաքն իր հաղթական ավարտին հասավ՝ շնորհիվ մեր կրթահամալիրի Աշակերտական Խորհրդի կողմից արված նվիրատվության։ 

 Նախագծի պլանավորման հենց սկզբից, միանալով այս կարևոր գաղափարին, Աշակերտական Խորհուրդը նախաձեռնեց և տարեմուտին իրականացրեց բարեգործական ամանորյա տոնավաճառ։

    Տոնավաճառից գոյացած հասույթը կազմեց 735․000 ՀՀ դրամ, որն ամբողջությամբ ուղղվեց նախագծին․ այս գումարը արշավի ընթացքում դարձավ ամենամեծ ֆինանսական օժանդակությունը։

Շնորհակալություն ենք հայտնում մեր կրթահամալիրի ողջ աշակերտական համայնքին և Աշակերտական Խորհրդի անդամներին՝ նախագծի գաղափարակիցը դառնալու, նախաձեռնողականության և պատրաստակամության համար։

  Մենք կարևորում ենք մեր երեխաների հումանիստական դաստիարակությունն ու նրանց մոտ՝ մարդկային բարձր արժեքների ձևավորումը։ 

    Փաստենք նաև, որ նախագիծը մեծ ոգևորություն է առաջացրել կրթահամալիրի ողջ համայնքում․ հանգանակության ընթացքում մանկավարժական և ծնողական համայնքը, մեր լավ ընկերներն ու բարեկամները աներկբա կատարեցին իրենց ներդրումը՝ գիտակցելով նախագծի կարևորությունը։

    Խորին շնորհակալություն ենք հայտնում բոլոր նրանց, ովքեր առանց վարանելու միացան մեզ ու մեր ազգանպաստ գործին։

Հարգելի՛ բարեկամներ, 

Մենք վստահ քայլերով շարժվում ենք առաջ, իսկ մեզ միացողների թիվը օր օրի ավելանում է։

Տեղեկացնե՛նք․

• Հանգանակության ավարտին մնացել է 22 օր։
• Կատարվել է ավելի քան 1.200․000 ՀՀ դրամի ներդրում։
• Մեզ միացել են նաև մեր կրթահամալիրի շրջանավարտները։

Շնորհակալ ենք բոլոր նրանց, ովքեր աջակցում են նախագծին, ակտիվորեն հանրայնացնում այն և կատարում հանգանակություն։

Հատուկ շնորհակալություն ենք հայտնում մեր անմահ հերոս Արթուր Ասատրյանի ընտանիքին իրենց կատարած ներդրման համար։

Սիրելի՛ ընկերներ, միացե՛ք մեզ, կատարե՛ք ձեր ներդրումը. հանուն լուսավոր ու անվտանգ ապագայի՝ այսօր կրթենք բանիմաց սերունդ։

ՀԱՇՎԵՏՎՈՒԹՅՈՒՆ

ռեԱրմենիա հարթակում հավաքագրված գումարների շրջանակներում "Կրթված սերունդը՝ հզոր հայրենիքի երաշխիք" նախագծի հաշվետվության հետ կարող եք ծանոթանալ այստեղ։