Առաջին օգնության դասընթաց և դեղատուփ ՍՅՈՒՆԻՔԻ ՄԱՐԶԻ սահմանային ընտանիքներին

44 օրյա պատերազմից հետո ՀՀ-ն ամեն օր կանգնում է լուրջ մարտահրավերների առաջ։ Շրջապատված լինելով թշնամական պետություններով, ժամանակ առ ժամանակ առնչվելով հակառակորդի պատերազմական սպառնալիքներին՝ մեր պարտքն է օր առաջ կրթվել, զինվել և լինել պատրաստ ցանկացած զարգացման։

2022 թ․ մեր փորձնական ծրագիրը՝ Սյունիքի և Տավուշի մարզերի մի քանի սահմանային գյուղերում իրականացված առաջին օգնության ծրագիրը ցույց տվեց, որ հանրության առնվազն 80%-ը չունի՛ բավարար գիտելիքներ առաջին օգնությունից, չունի՛ բավարար իրազեկվածություն՝ աղետների ժամանակ վարքի ճիշտ դրսևորում, չունի՛ առաջին օգնության դեղատուփ։

Մենք ցանկանում ենք մեր հայրենակիցների օգնությամբ սահմանին մեկնել օգնության մեր ձեռքը՝ նպաստելով, որ ընտանիքները զինվեն դեղատուփով, մարդիկ՝ գիտելիքով։

ԱԶԴԵՑՈՒԹՅՈՒՆ

Կազմակերպվող արշավի շրջանակներում փուլային տարբերակով ցանկանում ենք ամբողջ Սյունիքի մարզի սահմանամերձ և սահմանապահ համայնքներում իրականացնել Առաջին օգնության դասընթացներ ավագ դպրոցներում, մշակույթի տներում, ինչպես նաև նվիրել ընտանիքներին մեկական դեղատուփ։

Արդյունքում 2023-2024 թթ․ կունենանք 10,000+ հոգի, ովքեր կունենան անհրաժեշտ մինիմալ գիտելիքներ առաջին օգնությունից և առնվազն 1000 ընտանիք, ովքեր կունենան դեղատուփ։

ԽՆԴԻՐ

Սյունիքի մարզի ողջ երկայնքն ակամայից դարձել է սահման, և յուրաքանչյուրս հասկանում ենք այն մեծ վտանգը, որ կախված է ՀՀ-ի, մասնավորապես՝ Սյունիքի մարզի վրա։

Առանց ավելորդ խուճապի և վատատեսության՝ մենք կարևորում ենք օր առաջ բնակչությանը կրթել և զինել անհրաժեշտ գիտելիքներով, թե ինչպես վարվել պատերազմական, աղետային իրավիճակներում, ինչպես առաջին օգնություն ցուցաբերեն իրենց և իրենց հարևաններին, ինչպես օգտվեն դեղատուփից։

2022 թ․ մեր իրականացրած հետազոտությունները ցույց տվեցին, որ բնակչության 5%-ն անգամ տանը չունի դեղատուփ, իսկ հարցման մասնակցած 300 մարդկանցից մի քանիսը միայն կարողացան պատասխանել առաջին օգնության տարրական հարցերին։

Սա խնդիր է, որին պետք է օր առաջ լուծում տալ։

ԼՈՒԾՈՒՄ

Լուծումը մենք տեսնում ենք կրթության և անհրաժեշտ պարագաներով զինելու մեջ։

Փուլային տարբերակներով իրականացնում ենք կրթություն՝ սկսելով հանրակրթական դպրոցների ավագ դասարանների աշակերտներից և երիտասարդներից, այնուհետև յուրաքանչյուր ընտանիքի նվիրում դեղատուփ, որտեղ կլինեն դեղեր և պարագաներ՝ նախատեսված աղետային և պատերազմական իրավիճակների համար։

Նմանատիպ փորձառություն արդեն ունեցել ենք՝ 2022 թ․ դեկտեմբերին իրականացնելով ծրագիր Սյունիքի և Տավուշի մարզի մի քանի սահմանային համայնքներում։

• Դեկտեմբերի 7-9-ը Տավուշի մարզում էինք՝ Նորաշեն, Վերին Կարմիր Աղբյուր, Չորաթան, Մովսես, Արծվաբերդ, Բերդ համայնքներում, որի մասին մի փոքր կարող եք կարդալ հետևյալ հղումով.
• Դեկտեմբերի 20-ին՝ Սյունիքի մարզի Հարթաշեն, Քարաշեն համայնքների միջնակարգ դպրոցներում և Խնածախի մշակույթի տանը ունեցանք նմանատիպ ծրագիրը, հղումը.

ԹԻՄ

Ծրագիրն իրականացնելու է «Սպորտային առաքելություն Հայաստան» ՀԿ-ի կամավորական թիմը՝ հիմնադիր Արմեն Նիազյանի գլխավորությամբ։ Թիմին կցված են նաև մասնագետներ՝ Առաջին օգնության դասընթացավարներ, հրշեջ-փրկարար, բուժակ։

ԲՅՈՒՋԵ

Ծրագրի բյուջեն կազմվում է դեղատուփերի համար հատկացվող գումարից, ճանապարհածախսից և դասընթացավարներին տրվող սիմվոլիկ վճարից։

Արշավը բաժանված է 3 փուլի, առաջին փուլում նախատեսվում է դրամահավաքի միջոցով հավաքել 3․680․000 (400 դեղատուփ և առնվազն 8 դասընթաց), երկրորդ և երրորդ փուլերում՝ համապատասխանաբար 3․180․000 դրամ (յուրաքանչյուր փուլում՝ 300 դեղատուփ և առնվազն 8 դասընթաց)։

ՀԱՃԱԽ ՏՐՎՈՂ ՀԱՐՑԵՐ

1․ Ի՞նչ է պարունակում դեղատուփը - Դեղատուփերը բյուջետային են՝ հնարավորինս մատչելի։ Պարունակում են ամենաառաջնային դեղամիջոցները և պարագաները (ցավազրկող միջոցներ, վիրակապական, ախտահանող նյութեր, արյունահոսությունը դադարեցնող ռետինե լարան, ամոնիակի լուծույթ, վերքերի խնամքի համար նախատեսված պարագաներ․․․)։

2․ Հնարավո՞ր է մի քանի ժամվա ընթացքում փոխանցել անհրաժեշտ գիտելիքներ - Ե՛վ ոչ, և՛ այո․ մենք ցանկանում ենք մեր այցելություններով նախ կարևորել գիտելիքը, փոխանցել դեղատուփ, նաև՝ ցույց տալ այս ամենի կարևորությունը։ Բացի մի քանի ժամանոց մեր թրեյնինգներից նախատեսում ենք նաև կրթության հետագա շարունակություն՝ օնլայն և օֆլայն տարբերակներով։

3․ Ինչպես ունենալ վստահություն՝ արշավի արդյունավետ ընթացքի վերաբերյալ - Յուրքանչյուր նվիրատու կարող է ցանկացած ժամանակ միանալ արշավին՝ դառնալով կամավորական թիմի անդամ և անձամբ մասնակցելով արշավի յուրաքանչյուր փուլին։ Իհարկե, մենք պարտավորվում ենք նաև յուրաքանչյուր փուլից հետո հանդես գալ մանրամասն հաշվետվությամբ։

4․ Արդյոք չկա՞ն ավելի հրատապ խնդիրներ սահմանին, քան առաջին օգնությունը - Սահմանին ցանկացած խնդիր հրատապ է, և պահանջում է շուտափույթ լուծում։ Բոլորն էլ համաձայն, որ առաջին օգնության մասին գիտելիքներն ու դեղատուփի առկայությունը խնդիր է ոչ միայն սահմանին, այլ նաև ողջ հասարակության մեջ, իսկ երբ խոսում ենք սահմանի մասին, այն էլ՝ Սյունիքի մարզի, ապա այդ խնդիրը դառնում է ավելի քան հրատապ։

Նախագծի բյուջեի հետ կարող եք ծանոթանալ այստեղ։

Այս նախագիծն աջակցում է`

Կայուն Զարգացման Նպատակներին