Այս կրթաթոշակը ստեղծվել է 2022 թվականի ապրիլի 26-ին Երևանում՝ Լեոյի խաչմերուկում տեղի ունեցած ողբերգական ավտովթարից զոհված տաղանդավոր երիտասարդ հայուհու՝ Սոնա Մնացականյանի պատվին: Կրթաթոշակային ծրագիրը կրում է Սոնայի անունը՝ նպատակ ունենալով շարունակել նրա գործն ու աջակցել նրան այդքան մտահոգող խնդիրների լուծմանը:

Կրթաթոշակի պատմությունը

Կրթաթոշակային ծրագիրը նախաձեռնել է Սեդա Պապոյանը՝ Սոնայի ընկերուհին և FEMINNO-ի հիմնադիրը, և լայն աջակցություն է ստացել Սոնայի ընտանիքի ու ընկերների կողմից: 2022 թվականին՝ կրթաթոշակային ծրագրի առաջին տարվա ընթացքում, 10 վառ տաղանդներ պարգեւատրվեցին FEMINNO կոնֆերանսի շրջանակներում, 2023-ի դրամահավաքի արդյունքում հնարավոր եղավ կրթաթոշակ հատկացնել ևս 7 աղջիկների։ 2024 թվականին ևս 7 աղջիկներ նույնպես հնարավորություն ունեցան կրթաթոշակի շնորհիվ շարունակել իրենց կրթությունը Հայաստանի և աշխարհի հեղինակավոր համալսարաններում։

Սոնայի մասին

Սոնա Մնացականյանը բացառիկ տաղանդավոր կին էր, ում համար կարևոր էր Հայաստանին վերաբերող ամեն բան։ Նա օգնում էր ամեն կարիքավորի ու հնարավոր ամեն տեղ փոփոխություն բերում: Նրա կյանքի ուղին և հրաշալի ծրագրերը ողբերգական պատահարի արդյունքում ընդհատվեցին՝ իր հետ տանելով դեռևս չծնված դստերը։ Այժմ հատուկ առաքելություն է դարձել հետևել Սոնայի իմաստությանը և օգնել իրագործելու նրա երազանքները, որոնք կապված էին Հայաստանի, գիտության, տեխնոլոգիաների և այս ամենում դրսևորվող կնոջ տաղանդի հետ:

Կրթաթոշակի նպատակների եւ թիրախի մասին

Սոնա Մնացականյան կին տաղանդների կրթաթոշակը համախմբում է այն մարդկանց, ովքեր ճանաչում էին Սոնային և նրա աշխատանքը, ցանկանում են աջակցել նրա կիսատ թողած գործին։ Կրթաթոշակը նաեւ համախմբում է Հայաստանի STEM/ԳՏՃՄ ապագայով հետաքրքրված անձանց։

Հավաքագրված միջոցները միանվագ կրթաթոշակների տեսքով հատկացվում են տաղանդավոր հայ կանանց ու աղջիկներին հետեւյալ երեք հիմնական անվանակարգերում.

• Վերականգնվող էներգիա,
• Տեխնոլոգիա,
• Գիտություն։

Ձեր աջակցությունը կհասնի գիտությամբ զբաղվող նոր աղջիկների

Կրթաթոշակների նոր փուլը կրկին կշնորհվի FEMINNO կոնֆերանսի ընթացքում, որն այս տարի տեղի կունենա նոյեմբերի 15-ին՝ Ջրվեժի Woods կենտրոնում։ Հայաստանից և Արցախից տասը աղջիկներ և կանայք, ովքեր զբաղվում են վերը նշված երեք հիմնական ոլորտներից որևէ մեկով, աջակցություն կստանան շարունակելու իրենց ջանքերը: Հիմնական նպատակն է շարունակել Սոնայի ծրագրերը՝ զարգացնելու Հայաստանը որակյալ կրթության, տաղանդավոր մարդկանց աջակցության և, մասնավորապես, Սոնայի նման կանանց և աղջիկներին կրթելու շնորհիվ: Հաղթողները կընտրվեն բաց մրցույթի միջոցով, որը շուտով կհայտարարվի և կդիտարկվի կազմակերպիչներից, Սոնայի ընտանիքի անդամներից և ոլորտի մասնագետներից կազմված հանձնաժողովի կողմից:

Որպես խորհրդանշական ավանդույթ՝ ընտրված դիմորդներին մրցանակը հանձնում է Սոնայի մայրիկը։

Կրթաթոշակի ազդեցության մասին

«Ինձ համար շատ կարեւոր էր տեսնել, որ մեր երկրում կան մարդիկ, ովքեր կարեւորում ու խրախուսում են կանանց ու աղջիկների մասնակցությունը STEM ոլորտում, ինչը մեզ ավելի պատասխանատու է դարձնում հնարավորինս մեծ գործեր անել։ Իսկապես մեծ գործեր պիտի սպասեք մեզանից» - նշում է 2022 թվականին կրթաթոշակին արժանացած աղջիկներից մեկը՝ Անի Պետրոսյանը, ով այժմ տվյալագիտություն ու արհեստական բանականություն է ուսումնասիրում է Փենսիլվանիայի համալսարանում։ 

«Այս կրթաթոշակն ինձ հնարավորություն տվեց օգտագործել Գերմանիայում ուսանելու իմ հնարավորությունը ու գնալ իմ երազանքի հետեւից, քանի որ այլապես ֆինանսական խնդիրների պատճառով ստիպված էի հրաժարվել», - նշում է 2023 թվականի կրթաթոշակառուներից ՝ Մերի Գրիգորյանը, ով կրթաթոշակի շնորհիվ համակարգչային գիտություն եւ տվյալագիտություն ուսումնասիրեց Բրեմենի Յակոբս համալսարանում։

«Այս կրթաթոշակը ոչ միայն ինձ հնարավորություն է տալիս շարունակել իմ ընթացիկ կրթությունը դեղերի և բժշկության ոլորտում, այլ նաև խրախուսում է ուսումնասիրել առաջադեմ հետազոտական ​​հնարավորությունները, որոնք հետագայում կբարելավեն իմ կրթությունը»:, - նշում է 2024 թվականի կրթաթոշակառուներից Լաուրա Գևորգյանը, ով մասնակցեց դեղագործության մագիստրոսական ծրագրի Ֆրանսիայում՝ Բուրգունդիայի համալսարանում։

Սոնա Մնացականյանը հավատում էր, որ կրթությունը կարող է փոխել կյանքը, և յուրաքանչյուրն արժանի է այդ հնարավորությանը։ Եկե՜ք շարունակենք Սոնայի տեսլականն ու աջակցենք երիտասարդության կրթությանը:

Նախագծի բյուջեին կարող եք ծանոթանալ այստեղ։