Մշակութային բարձր արժեք ներկայացնող «Սասունցիներ» պատմական որմնանկարը ժամանակի ընթացքում վնասվել է և այժմ վերականգնման կարիք ունի:

Նախագծի նպատակն է վերականգնել որմնանկարի նախկին տեսքը։

Այդ իսկ պատճառով մենք դրամահավաք ենք սկսում՝ մեր համայնքի կարևոր մասնիկը պահպանելու համար։

Ձեր աջակցությամբ մենք կարող ենք կյանքի կոչել, ինչպես նաև վերականգնել «Սասունցիներ» պատմական որմնանկարի վառ գույներն ու ուղերձը գալիք սերունդներին:

Անհրաժեշտ է կատարել հետևյալ աշխատանքները ըստ հերթականության՝

1. Թռչունների ցերտերի մաքրում չոր եղանակով միջին կոշտության սպունգներով:
2. Որմնանկարի ամբողջ մակերեսի չոր մաքրում հատուկ վրձինների միջոցով:
3. Մաքրված ամբողջ նկարչական հատվածի ամրակայում հատուկ լուծույթի միջողով:
4. Որմնանկարի վրա առկա ճաքերի եզրերի մաքրում ու նոր կիրավազային սվաղով նորոգում:
5. Ժամանակին անորակ արված վարդագույն սվաղի հեռացում, պատի մաքրում ու նոր կիրավազային սվաղի քսում:
6. Բնական գունափոշիներով (terre naturali) նոր սվաղված հատվածների նկարչական լրացում:
7. Որմնանկարի պահպանման նպատակով ամբողջ մակերեսին հատուկ պաշտպանիչ հեղուկի քսումով:
8. Անհրաժեշտության դեպքում պատից պոկված հին սվաղի ներարկում հատուկ շաղախի միջոցով:
9. Աշխատանքների ընթացքում լուսանկարչական մանրամասն փաստագրություն և կատարված աշխատանքների հաշվետվություն:

Վերը նկարագրված բոլոր աշխատանքները կիրականացնեն Իտալիայից հրավիրված վերականգնող ճարտարապետ Արա Զարյանը և որմնանկարի վերականգնող մասնագետ Քրիստին Լամուղեն:

Բոլոր աշխատանքները կիրականացվեն բարձր մասսնագիտական մակարդակով ու Իտալիայից բերված նյութերով ու գործիքներով:

«Սասուն­ցի­ներ» որմնանկարի պատմությունը

1974 թ. Հայաստանի ժողովրդական նկարիչ Սարգիս Մուրադյանը՝ երկու օգնականի հետ (Հ. Հակոբյան, Գ. Սմբատյան) Ապագա գյուղի մշակույթի տան նախարսահի պատին պատկերեցին «Սասուն­ցի­ներ» մեծադիր կոթողային որմնանկարը, որը ՀՀ ԳԱԱ Արվեստի ինստիտուտի տնօ­րեն, արվեստաբան Արարատ Աղասյանի գնահատմամբ՝ «Խորհրդային Հայաստանում մոնումենտալ նկարչության բնագավառում երբևէ ստեղծված առավել հաջող, գաղափարական և կերպարային խոր ու հրատապ բովանդակությամբ գեղարվեստական արտահայտիչ լեզվով օժտված որակյալ աշխատանքներից է»:

Որմնանկարում պատկերված են ոչ թե կոնկրետ իրադարձություններ, այլ այլաբա­նական, ընդհանրացնող, խորհրդանշանի ուժով օժտված պատկերներ: Եռամաս կոմպոզիցիայի կենտրոնական ֆիգուրը՝ մանկանը գրկած մայրը, պատ­կերված է Տիրամոր ավանդական դիրքով, սակայն խրոխտ և հայրենի տունը պաշտպանելու վճռականության արտահայտությամբ:

Խորհրդանշական են առաջին պլանում դեպի հանդիսատեսը բացված «Սասնա ծռեր» մագաղաթյա մատյանը, մանկան օրորոցին հենված հրացանը, խաչքարն ու հայ ավանդական ճարտարա­պետական կոթողի ուրվագծերը:

Ձախից մարտի տեսարան է, որի կերպարներից մեկը զորավար Անդրանիկն է: Որմնանկարի աջ մասի տեսարանում զինվորները կռվից հետո իրենց ուսերի վրա տանում են զոհված ընկերոջը. դա Գևորգ Չաուշն է:

Ստեղծման իսկ օրվանից որմնանկարը դարձավ Ապագայի բնակիչների սիրե­լին: Նրանք այդ պատկերն ընկալում են որպես իրենց պատմության խտացում և ժամանակին կարողացել են պաշտպանել այն Խորհրդային իշխանությունների՝ «ազգայնական» բովանդակությամբ նկարը ոչնչացնելու որոշումն իրականացնելուց: 

Նախագիծն իրականացնող թիմը

• ՀՀ Արմավիրի մարզի Արաքս Համայնքապետարան
• Արա Զարյան, վերականգնող ճարտարապետ
• Քրիստին Լամուղե, վերականգնող մասնագետ

Միացե՛ք մեզ՝ պահպանելու մեր պատմությունը և արվեստը:

Այստեղ կարող եք տեսնել նախագծի բոլոր ծախսերը:

Այս նախագիծն աջակցում է`

Կայուն Զարգացման Նպատակներին

«Ապագա Հայկանանը» Նպատակներին