Բյուջեի փոփոխություն

Դրամահավաքի մեկնարկն ու ընթացքը ցույց տվեց որոշ փոփոխությունների անհրաժեշտություն, որը կբարելավի արշավի արդյունավետությունը։

Ուստի կատարել ենք հետևյալ փոփոխությունները։

Կրճատել և հետաձգել ենք սեմինարների անցկացման և վերանորոգման նախնական պարագաների ձեռքբերմանն ուղղված ծախսերը, ուղղելով այն հենց մեր թիմի՝ դասընթացների մասնակցելուն, քանի որ զգացվեց փորձի պակաս ֆոնդահյթայթման, համայնքաշինության և մարքեթինգային ոլորտներում։

• 380.000 դրամ նախատեսել ենք «reArmenia Acadmey» եռամսյա կրթական ծրագրի վճարի համար, ֆոնդահայթայթման և այդ ընթացաքում արհեստական բանականության արդյունավետ կիրառման հմտությունների զարգացման համար։
• 79000 դրամ արժողությամբ համայնքաշինության դասընթացն անցկացնում է մեր ռազմավարական գործընկեր ՄԵՄի հիմնադիր Մայիս Մարգարյանը։ Որպես աջակցություն մեզ այդ դասընթացը տրամադրվում է 40.000 դրամով։
• 290.000 դրամ նախատեսել երկամսյա SMM ծառայության և վիդեո/ֆոտո կոնտենտի ստեղծման համար։ Միյնչ այս մենք փորձում էինք ինքներս մեր ռեսուրսներով անել դա, սակայն փորձը ցույց տվեց, որ պրոֆեսիոնալ թիմի ներգրավվածությունը կարևոր է։ Այս ծառայությունը նույնպես տրամադրվել է մեզ 110.000 դրամ զեղչով։

Օգտվելով մեր մենթոր Միշա Պողոսյանի՝ Գյումրիում հիմնած BAL Marketing and Creative LAB-ի ինչպես նաև մեր մյուս մենթոր Մայիս Մարգարյանի Community building դասընթացի ծառայություններից՝ մենք նաև մնում ենք հավատարիմ մեր առաքելությանը, ամեն լուման ծախսելով այն ուղղությամբ, որտեղից հնարավորինս շատ մարզեցի ուսանող գումար կաշխատի, քանի որ այս երկու ընկերություններն էլ իրենց թիմում ակտիվ ներգրավում են մարզերի ուսանողներին։

Այս նույն տրամաբանությամբ էլ մենք վերանորոգման պրոցեսում վարպետ-սանտեխնիկի հետ որոշել ենք կցել նաև ճարտարագիտության և գծագրության ոլորտի ուսանողի, ով վճարովի պրակտիկա կանցնի հենց մեր նախագծի աշխատանքների ժամանակ։

Նաև ուզում ենք տեղեկացնել, որ մեր բյուջեի նպատակային առաջին փուլի ավարտին մնաց ընդամենը 89.500 դրամ։ Շատ ուրախ կլինենք, եթե կիսվեք ձեր ընկերների հետ գաղափարով, օգնելով ներգրավել այդ գումարը և հնարավորություն տալով սկսել աշխատանքները։

Շնորհակալություն, որ մեզ հետ եք։

1 մլն դրամ Գյումրու «Ամերիկյան Թաղամաս»-ից

Հենց Ամերիկյան Թաղամասում է գտնվում «ԻմասՏուն» շենքը։ Մեր ռազմավարական գործընկերը արտոնյալ պայմաններով տարածքը տրամադրելուց բացի նաև մեր նախագծին է նվիրաբերել 1 մլն դրամ։ Այս թաղամասի կարգավորված, նպատակային գծված ենթակառուցվածքները, համայնքակենտրոն ռազմավարությունը և բնակիչների սեգմենտի հատուկ ընտրությունը լավագույն վայրն է դարձնում այս տեղանքը մեր գործունեության համար։

մոտ 7000 $ արժողությամբ սմարթ գրատախտակ

Էս նկարի մեջ ձևական դրած հեռուստացույցի տեղը արդեն իսկական տեխնիկա ունենք։

Մեր ռազմավարական գործընկեր Մարզերի երեխաները մարզերում նախաձեռնությունը Mayis Margaryan-ի գլխավորությամբ մեզ է նվիրել մեծ սենսորային էկրանով սմարթ գրատախտակ։

Շաատ շատ շնորհակալ ենք։

Մենքը եսից մեծ։

reArmenia Academy-ում սովորելու ընթացքում Gevorg Poghosyan -ը մեր մենթորն է, և մեր ուսանողական նախաձեռնության մասին քննարկումներից հետո մի քանի կարևոր փոփոխություններ մշակեցինք։

Մենք ուսանողին կացարան ենք տրամադրելու 6 ամսով միայն, որոշ դեպքերում առավելագույնը 1 տարի, հանրակացարանի փոխարեն դիրքավորվելով որպես "student transition hub":

Նպատակը՝

1. Մեծացնել ազդեցությունը, ավելի շատ ուսանող ներգրավելու համար։

2. Ուսանողին 6 ամսում դարձնել ինքնաբավ, ինտենսիվ կերպով ձեռք բերել օգտակար հմտություններ, գտնել առավելագույն համատեղելի աշխատանքը իր կրթության ուղղությամբ, որը

և՛ ֆինանսական եկամուտ կապահովի նրան,

և՛ կօգնի սովորածը պրակտիկ դաշտում կիրառելու ու ուսման նպատակից չշեղվելու հարցում։

Արդյունքում ուսանողը ինքնուրույն կկարողանա վարձել բնակարան, և տեղ ազատել հաջորդ սերնդի համար։

Մեր գլխավոր արժեքը ապակենտրոնացվածության գաղափարն է

Միշտ կա վտանգ, որ ուսանողը, գյուղից քաղաք գալով, կարող է կորցնել կապը իր համայնքի հետ։ Իսկ դա արդեն իսկ մեր գաղափարներին հակասում է, և Գյումրին դարձնում ենք երկրորդ «Երևան»։

Այս վտանգը չեզոքացնելու համար մենք առավելություն կտանք այն ուսանողներին, ովքեր պլանավորում են կամ արդեն իսկ սովորում են Երևանում, բայց մեր կրթական և զարգացման հնարավորություններին ծանոթանալուց հետո կնախընտրեն տեղափոխվել Գյումրի:

Նույնիսկ եթե ուսանողը չի տեսնում իր ապագան գյուղում, և ցանկացած պարագայում քաղաք է տեղափոխվելու, Երևանի փոխարեն Գյումրի տեղափոխվելը կնվազեցնի կենտրոնացվածությունը՝ հավատարիմ մնալով մեր հիմնական առաքելությանը:

Իսկ ամենամեծ առավելությունը տալու ենք Երևանում ապրող և Գյումրի տեղափոխվել, սովորել ցանկացող ուսանողին (այսպիսի նախադեպեր արդեն կան)։ Սա կարող է սոցիալապես անարդար թվալ, քանի որ Երևանի բնակիչը անգամներ ավելի քիչ սոցիալական աջակցության կարիք ունի քան գյուղերից եկած ուսանողները, բայց սա ունի հետևյալ տրամաբանությունը։

1. Նախ Երևանից եկող ուսանողին տրամադրելու ենք առավելագույմը 6 ամսով։

2. Երևանցին մարզ տեղափոխվելով իր հետ բերում է մեծ փոփոխություն։ Լինելով թվաքանակով ամենափոքր կատեգրիայի շահառուն, իր օրինակով ցույց է տալիս, խրախուսում է մարզեցի ուսանողներին մնալ և սովորել մարզում։

3. Երևանցին Գյումրի գալիս նույնպես ունի աջակցության կարիք, բայց ոչ այնքան ֆինանսական, որքան հոգեբանական։ Հասարակության, ընտանիքի, ընկերների կողմից բացասական է ընկալվում Երևանից մարզ տեղափոխվելը, համարելով դա տարօրինակ որոշում ի հակադրություն մարզերից դեպի Երևան մեծ հոսքի։ Այս որոշումը հանդիպում է դիմադրության, իսկ դրա հաղթահարման դեպքում էլ, ծնողների կողմից ստանում են նվազագույն աջակություն։

Շնորհակալ եմ մեր բոլոր աջակիցներ, ովքեր մեզ վստահել են, անկախ գումարի չափից։

Շնորհակալ եմ նաև դեռևս չաջակցած մարդկանց։ Ձեր շնորհիվ, նույնպես, մեր նախագիծն ավելի անթերի է դառնում։ Մենք մանրակրկիտ վերլուծում ենք, փնտրում ենք թերությունները։

Օգտվելով դրամահավաքի պասիվության ընձեռնած հնարավորությունից՝ ժամանակից, երկրորդ հարկում 2 փոփոխություն արեցինք.

1. Առաջ ունեինք երկու 4 հոգանոց սենյակ։ Դրանցից մեկը բաժանեցինք 2 մասի, 1 հոգանոց և 3 հոգանոց սենյակների։

Մեր ուսումնասիրությունները ցույց տվեցին, որ ավելի լայն առաջարկը կօգնի ավելի մեծ զբաղվածություն ապահովել, օգտագործելով սենյակները բազմապրոֆիլ եղանակներով։

2. Երկու երկտեղանոց սենյակները մնացին նույնը, սակայն ավելացրեցինք առանձին սանհանգույց, կրճատելով զգեստապահարանի համար նախատեսված տարածքը։

Քանի որ սրանք նախատեսել ենք մեր խոսնակների, գործընկերների, հյուրերի համար, ովքեր գալու են ուսանողների հետ կիսվելու իրենց փորձով, գիտելիքով։ Իսկ մեծ զգեստապահարանի անհրաժեշտությունն ավելի քիչ կլինի, քանի որ սենյակները զբաղված են լինելու առավելագույնը 2-3 օրով, բացառությունները չհաշված։

Կազմեցինք նաև նոր գնառաջարկ փոփոխությունից ելնելով։

1 հոգանոց սենյակ - 20.000 դրամ ամսական։

3 հոգանող սենյակ - 50.000 դրամ ամսական (16.600 դրամ յուր. ուսանողի համար)

4 հոգանոց սենյակ - 60.000 դրամ ամսական (15.000 դրամ յուր. ուսանողի համար)

Իհարկե տարածքի գործունեության, սպասարկման համար այս գումարները նույնիսկ ինքնարժեքը չեն ծածկում (ծախսի 60%ը միայն, մեր հաշվարկով), ուստի մնացած ծախսերը հոգալու համար ազատ սենյակներ լինելու դեպքում, դրանք տրամադրելու ենք նաև օրավարձով, խիստ պահելով այցելուների սեգմենտը, հյուրընկալելով բացառապես մեր աջակիցներին և գործընկեր կազմակերպությունների աշխատակիցներին, որոնց տրամադրման պայմանների մասին կտեղեկացնենք շուտով։

Եթե էլի անհասկանալի մասեր, հարցեր, առաջարկներ ունենաք, շատ շնորհակալ կլինեմ, եթե ուղարկեք մեզ։ Դա նույնքան կարևոր է, որքան ֆինանսական աջակցությունը նախագծին։