Մեր գաղափարը

Հայրենիքի պաշտպանների կյանքի որակը և մեր երկրում նրանց արժանապատիվ ապագան կրթության միջոցով փոխելն է։

Կատարի՛ր ամենակարևոր ներդրումը մեր հայրենիքի պաշտպանի կյանքում

Հիմնադրամը տրամադրում է ոչ միայն ուսման կրթավճար բարձրագույն կամ միջին մասնագիտական ուսումնական հաստատություններում սովորող պատերազմի մասնակիցներին մինչև ուսումնառության ավարտը, եթե վերջիններս ապահովում են․

• միջինից բարձր առաջադիմություն և
• տարեկան 120 ժամ կամավորություն՝ դառնալով բարության շղթայի կրողներ,

այլ նաև կազմակերպում իրենց համար բազմաթիվ մշակութային, ճանաչողական և մասնագիտական կողմնորոշման միջոցառումներ պատերազմից հետո հասարակական կյանք ինտեգրելու համար։

Դարձի՛ր կրթության առաջնորդ և կատարի՛ր նվիրաբերություն հիմա

2021-22 ուստարում Հիմնադրամը ֆինանսավորել է ՀՀ տարբեր ԲՈՒՀ-երում սովորող 27 շահառուի, ովքեր հաղթահարելով ֆիզիկական և հոգեբանական տարբեր խոչընդոտներ շարունակում են գնալ իրենց երազանքի հետևից և կերտել մեր հայրենիքի ապագան։

Հիմնադրամի շահառուներից 20 քաջորդիների 2022-2023 ուստարվա առաջին կիսամյակի ուսման ծախսերը հոգալու համար անհրաժեշտ է հավաքագրել 4 140 400 դրամ։ Նշված գումարը չի ներառում որևէ վարչական ծախս և ուղղակիորեն փոխանցվելու է համապատասխան ուսումնական հաստատություններ։

2022-23 ուստարում շահառուների թիվը կհասնի մինչև հարյուրի։

Ներկայիս շահառուների մեծ մասն ապագա բժիշկներն են, ովքեր պատերազմի ընթացքում հարյուրավոր կյանքեր են փրկել ամենաթեժ կետերում՝ տարհանելով և առաջին օգնություն ցուցաբերելով վիրավոր զինվորներին։

Ինչպես օրինակ Մարտիրոսը, Գևորգը, Արսենը և Արմանը, ովքեր միասին սովորել են ռազմաբժշկական ամբիոնում և պատահական սկզբունքով ծառայության ժամանակ տեղակայվել Որոտանում։ Նրանք չորսն էլ դարձել են համապատասխան բուժծառայությունների պետեր մարտական գործողությունների ժամանակ։ Իսկ պատերազմից հետո շարունակեցին ուսումը և ընտրեցին բժշկության ամենադժվար ճյուղերը՝ վերակոնդանացում և անեսթեզիոլոգիան։ Մինչդեռ Արմանը որոշել է դառնալ ուրոլոգ՝ նպաստելով մեր երկրի ժողովրդագրական աճին և արդեն իսկ դարձել է հայր։

Հայրենիքի պաշտպանները մեր ապագայի կերտողներ

«4090 Բարեգործական» հիմնադրամը ստեղծվել է արցախյան վերջին պատերազմից հետո, և իր նպատակն է տրամադրել կրթության և հետագա մասնագիտական ընտրության հնարավորություն 2016 և 2020թթ պատերազմի մասնակից մեր հայրենիքի պաշտպաններին։

Այս արշավի շրջանակում Դու նույնպես կարող ես ունենալ քո կարևոր ներդրումը պատերազմի մասնակից հայորդիների կյանքում՝ օգնելով նրանց ձեռք բերել հիմնարար կրթություն և նաև ցանկության դեպքում դառնալ ՄԵՆԹՈՐ վերջիններիս համար։   

Ստորև ներկայացված է այն շահառուների ցանկը, ովքեր կկարողանան շարունակել իրենց կրթությունը ձեր անմիջական աջակցությամբ:

1. Կամո Առուստամյան ՎՊՀ, Ակտուարական մաթեմատիկա և ֆինանսներ, 2-րդ կուրս 
2. Արման Երեմյան ԵՊԲՀ Ընդհանուր բժշկություն, 4-րդ կուրս
3. Դավիթ Տիգրանյան ԵՊԲՀ Ընդհանուր բժշկություն, 5-րդ կուրս
4. Արեն Շահնազարյան ԵՊԲՀ Ընդհանուր բժշկություն, 2-րդ կուրս
5. Արսեն Խաչատրյան ԵՊԲՀ Անեսթեզիոլոգիայի և ռեանիմացիայի ամբիոնի կլինիկական օրդինատոր, 1-ին կուրս
6. Գևորգ Գևորգյան ԵՊԲՀ Անեսթեզիոլոգիայի և ռեանիմացիայի ամբիոնի կլինիկական օրդինատոր, 1-ին կուրս
7. Դավիթ Օհանյան ՎՊՀ, Ակտուարական մաթեմատիկա և ֆինանսներ, 2-րդ կուրս
8. Ղևոնդ Միքայելյան ՀԱԱՀ Անասնաբուժական սանիտարական փորձաքննություն, 2-րդ կուրս 
9. Նարեկ Պետրոսյան ՀՊՏՀ, ֆինանսներ, 1-ին կուրս 
10. Շահբազ Ավետիսյան Հյուսիսային համալսարան կառավարում, 1-ին կուրս 
11. Վանուշ Մելքոնյան ՀՖԿՍՊԻ, Ֆուտբոլ, 1-ին կուրս 
12. Դավիթ Սարգսյան ԵՊԲՀ Ընդհանուր բժշկություն, 2րդ կուրս
13. Արման Դավթյան ԵՊԲՀ Ուրոլոգիայի և անդրոլոգիայի ամբիոնի կլինիկական օրդինատոր, 1-ին կուրս
14. Մարատ Սարյան ԵՊԲՀ քոլեջ, պրոթեզավորում, 2-րդ կուրս 
15. Կարապետ Սարգսյան ԵՊԲՀ քոլեջ, պրոթեզավորում, 2-րդ կուրս 

Միացե՛ք երազանքի իրականացման նախաձեռնությանը և գնահատե՛ք այն բարդ ուղին, որ մեր հայորդիներն անցել են 2020 թվականին բոլորիս համար։

Հաճախ տրվող հարցեր

Ինչու՞ 4090

4090ը Հայկական լեռնաշխարհի քառագագաթ Արագածի ամենաբարձր կետի՝ հյուսիսային գագաթի բարձրությունն է (4090մ)։

Ովքե՞ր են շահառուները

2016թ․և 2020թ․ պատերազմական գործողություններին մասնակցած այն բոլոր անձինք, ովքեր այս պահին բնակվում են ՀՀ կամ Արցախում և սովորում են բարձրագույն կամ միջին մասնագիտական ուսումնական հաստատությունում

Ո՞վ է ֆինանսավորում

Մինչ օրս բոլոր միջոցները հավաքագրվել են Հայաստանում և արտերկրում ապրող անհատների բարեսիրության շնորհիվ։

Արդյո՞ք պետությունը չի փոխհատուցում պատերազմի մասնակիցների ուսման վարձը

Համաձայն ՀՀ կառավարության հոկտեմբերի 1752-Ն որոշման 28, 2021 մարտական գործողություններին մասնակցած ուսանողները ուսման վարձի կեսից ավելին ստանում են միայն այն դեպքում, եթե նրանց միջին միավորը (ՄՈԳ) գերազանցում է 60%-ը, հակառակ դեպքում փոխհատուցում չի տրվում:

Ինչպե՞ս է տրամադրվում կրթավճար

«4090 բարեգործական» հիմնադրամը հոգում է պատերազմի մասնակիցների ուսման վարձի 50-100%-ը։ Կրթավճարն անմիջապես փոխանցվում է ուսումնական հաստատությանը։ Շահառուներն անձամբ որևէ գումար չեն ստանում։

Այս նախագիծն աջակցում է`

Կայուն Զարգացման Նպատակներին

«Ապագա Հայկանանը» Նպատակներին