«Կողբ» թվային ստուդիայի վեբ ծրագրավորման դասընթացը թվային հմտությունների կատարելագործման եզակի հարթակ է, որը հնարավորություն է ընձեռում Տավուշի մարզի երիտասարդներին դառնալ մրցունակ մասնագետ՝ առանց հեռանալու իրենց համայնքից։

Ի՞նչ ազդեցություն կունենա նախագիծը

Եռամսյա դասընթացը հաջողությամբ ավարտած 10 ուսանողները ձեռք կբերեն վեբ ծրագրավորման հիմնարար գիտելիքներ և գործնական հմտություններ։

Ստուդիայի օգնությամբ դասընթացի մասնակիցները կմեկնարկեն իրենց առաջին քայլերը՝ ֆրիլանս հարթակներում կստեղծեն անձնական պորտֆոլիո-կայք և գործադրելով ձեռք բերված հմտությունները մուտք կգործեն աշխատաշուկա:

Դասընթացի ավարտին շրջանավարտների որոշ մասը կգտնի աշխատանք ՏՏ ոլորտում կամ կսկսի աշխատել սեփական նախագծերի վրա ինչի շնորհիվ կստեղծվեն նոր ստուդիաներ և նախաձեռնություններ:

Հայաստանում՝ հատկապես Տավուշի մարզում, որակյալ և մատչելի վեբ ծրագրավորման կրթության հասանելիության լուրջ խնդիրներ կան։ «Կողբ» հիմնադարամի թվային ստուդիան տևական ժամանակ է հաջողությամբ դասավանդում է UI/UX դիզայն, որի շուրջ ստեղծված մեծ հետաքրքրությունը նպաստել է ուսանողների շրջանում նաև վեբ ծրագրավորում սովորելու մեծ պահանջարկի առաջացմանը։

Որակյալ կրթության դժվարհասանելիությունը խոչընդոտում է նաև տեղական բիզնեսների թվայնացմանը և մրցունակությանը, իսկ երիտասարդները ստիպված են տեղափոխվել մայրաքաղաք՝ համապատասխան կրթություն ստանալու նպատակով, ինչը թուլացնում է համայնքները և խորացնում տարածաշրջանների անհամաչափ զարգացումը։ Ուստի, Տավուշի մարզում անվճար որակյալ վեբ ծրագրավորման կրթության հնարավորությունը կարող է դառնալ կարևոր գործոն տարածաշրջանի զարգացման համար։ 

Նախագիծն առաջարկում է բարձրորակ վեբ ծրագրավորման անվճար դասընթաց Տավուշի մարզում, որը ներառում է HTML, CSS, ինչպես նաև ժամանակակից վեբ տեխնոլոգիաների ուսուցում: Դասընթացը զինում է ուսանողներին գործնական հմտություններով և նախագծերի վրա աշխատելու կարողությամբ: Թվային ստուդիան ապահովում է մենթորություն և կարիերայի խորհրդատվություն՝ օգնելով ուսանողներին գտնել աշխատանք կամ սկսել սեփական նախագծերը, նպաստելով տեղական թվային էկոհամակարգի զարգացմանը և ստեղծելով նոր հնարավորություններ երիտասարդների համար:

Ի՞նչ արդյունքներ կունենանք

3 ամիս անց ակնկալվում է ունենալ՝

• Դասընթացը հաջողությամբ ավարտած շրջանավարտներ
• Յուրաքանչյուր ուսանողի անձնական պորտֆոլիո-կայք
• Ֆրիլանս հարթակներում գրանցված շրջանավարտներ

Ի՞նչ կստանան երիտասարդները

• Ժամանակակից մասնագիտական հմտություններ
• Աշխատանքի հեռանկար
• Անձնական զարգացման հնարավորություն
• Համայնքում մնալու պայմաններ

Ու՞մ համար է նախագիծը

Նախագծի հիմնական թիրախային խումբն ընդգրկում է Տավուշի մարզի 18-40 տարեկան երիտասարդներին, որոնք ցանկանում են ձեռք բերել նոր մասնագիտական հմտություններ վեբ ծրագրավորման ոլորտում և ձգտում ստանալ որակյալ կրթություն՝ առանց հեռանալու իրենց համայնքից:

Նախագծի շահառուներն են, ինչպես առաջին անգամ մասնագիտություն ձեռք բերող երիտասարդները, այնպես էլ նրանք, որոնք ցանկանում են վերաորակավորվել՝ համապատասխանելու ժամանակակից աշխատաշուկայի պահանջներին:

Այս նախագիծը նաև համայնքի զարգացման համալիր ռազմավարության կարևոր մասն է, որին աջակցելով կարող ենք ստեղծել մրցունակ համայնք և նպաստել համաչափ զարգացմանը։

Նախագծի բյուջեն կարող եք գտնել այստեղ։