Խնդիրը

Ո՞վ է հաշվել, թե քանի Picsart կամ այլ հայկական Unicorn (1 մլրդ դոլար և ավելի արժեքով տեխնոլոգիական ընկերություններ) ստարտափեր մենք այսօր չունենք զուտ այն պատճառով, որ 10 տարի առաջ համակարգչային տեխնիկայով «չզինեցինք» նման մարզաբնակ տաղանդավոր երեխաներին և թողեցինք նրանց բախտի քմահաճույքին․․․

Երեխաների մասնագիտական աճի հիմնական խնդիրներից մեկը համակարգչային տեխնիկայով ապահովվածության ցածր մակարդակն է։ Տաղանդները, չունենալով տեխնիկա, զրկվում են որակյալ առցանց կրթության, հաղորդակցման, օգտակար կապերի ընդլայնման, առաջադրանքների միջոցով փորձի կուտակման, մասնագիտական աճի և աշխատանքի անցնելու հնարավորություններից։ Փորձը ցույց է տալիս, որ լավ սովորող աշակերտների միայն 15-20 տոկոսն է, որ ունի համակարգիչ, իսկ մյուսների մեծ մասը կամ ոչինչ չունի կամ ունի միայն հեռախոս։

2021 թ-ին «Մարզերի երեխաները մարզերում» ՀԿ-ն կարողացել է անհատներից և կազմակերպություններից ներգրավել և մարզեցի տաղանդներին ապահովել որոշ տեխնիկայով, սակայն դա շատ քիչ է իրենց հերթին սպասող տաղանդների թվի համեմատ։ 2021 թ-ի վիճակագրությունը հետևյալն է․ ինչպես տեսնում եք, բաժին է հասել բոլոր մարզերին, իսկ տեխնիկա ստացող երեխաների մոտ 63 տոկոսը անցնում է հեռավար կամ տեղում աշխատանքի՝ այդպիսով օժանդակելով նաև մարզերում և գյուղերում մնալու ժողովրդագրական խնդրի լուծմանը։

Ինչ համագործակցություն ենք ակնկալում

Բարվոք վիճակում կամ նոր համակարգիչներ մարզերի 10 տաղանդավոր երեխաներին, որոնց մենք կներկայացնենք ցուցակով։ Ցուցակի հիմքում ընկած են երեխաների սոցիալական դրությունը, հետաքրքրությունները, աշխատասիրությունը, ակտիվությունը համայնքային զարգացման և կամավորական աշխատանքներում։

Նոթբուքի նվազագույն պահանջ՝ Intel Core i5, 8gb ram + videocard

Գարիկ Հայրապետյան, Սյունիքի մարզ, գ․ Շինուհայր, 17 տ․։ Արմաթցի է, ինքնուսուցվող, հետաքրքրասեր, աշխատասեր մեկը, ով արդեն հեռավար աշխատանքներ է անում հետազոտությունների, գրաֆիկ դիզայնի, իլյուստրացիաների ուղղություններով։ Ցանկանում է դառնալ բժիշկ-ինժեներ։ Չունենալով համապատասխան նոթբուք՝ հաճախ առաջադրանքները անում է դպրոցից կամ ընկերների տանից։

Նոթբուքի նվազագույն պահանջ՝ Intel Core i3, 4gb ram + ssd

Նարեկ Սողոմոնյան, Արարատի մարզ, գ․ Աբովյան, 15 տ․։ Արցախում կորցնելով տունը՝ տեղավորվել է Արարատի մարզում, ակտիվ ներգրավվել է կամավորական աշխատանքներում, օնլայն եղանակով սովորել է SEO, հեռավար փորձաշրջանի մեջ է։ Լինելով ակտիվ շարժերի մեջ և չունենալով նոթբուք՝ չի կարողանում մասնակցել ինքնազարգացման այլ դասերի։

Ջանիկ Պետրոսյան, Գեղարքունիքի մարզ, ք․ Ճամբարակ, 14 տ․։ Ճամբարակի ամենաակտիվ երիտասարդներից է, տեղի «Միջանցք» երիտասարդական կենտրոնի կազմակերպիչ-կամավորներից է։ Հետաքրքրվում է մի շարք թվային մասնագիտություններով, շատ է ուզում ամեն ինչ փորձել, տարբեր առաջադրանքներում ներգրավվել, սովորել ինչ հնարավոր է, բայց չունի համակարգիչ․․․

Լենա Թաթևոսյան, Ջավախք, գ․ Ախալցիխե, 16 տ․։ «Արմաթ» ԻԼ-ի սան է, շա՜տ ակտիվ է բազմապիսի առաջադրանքներում՝ թարգմանություն, ծրագրավորում, դիզայն, հետազոտություններ, վերլուծություններ, մենեջմենթ․․․ Չի վախենում սխալվել, շատ արագ է, բայց արագացմանը խանգարում է տեխնիկայի բացակայությունը․․․

Կառմեն Դանիելյան, Լոռու մարզ, ք․ Սպիտակ, 15 տ․։ Շա՜տ ակտիվ է, փորձում է ամեն բան, անկեղծությամբ հավատում է կամավորության գաղափարին, համայնքային զարգացման ծրագրերում միշտ կա, գիտի ինչպես սովորել, այսինքն՝ սովորել ինչպես սովորել, իսկ դրա համար միայն հեռախոսը քիչ է․․․

Եվա Թովմասյան, Արմավիրի մարզ, գ․ Քարակերտ, 17 տ․։ Հետաքրքրված է HR-մենեջմենթով, արդեն իսկ կամավորություն է անում այդ մասով «ՄԵՄ» ՀԿ-ում, չի վախենում փորձել, սխալվել, ունի քննադատական մտածողություն։ Այս ամենը զարգացնելու համար միայն հեռախոսը քիչ է․․․

Էմմա Մելքոնյան, Արմավիրի մարզ, գ․ Գեղակերտ, 13 տ․։ «Արմաթ» ԻԼ-ի սան է, շա՜տ ակտիվ է բազմապիսի առաջադրանքներում։ Ապագա ծրագրավորող է։ Չնայած փոքր տարիքին՝ շատ պատասխանատու է։ Միայն հեռախոսով ակտիվությունների մասնակցելը արգելակում է նրա աճի բնական ներուժը։

Զինա Պողոսյան, Տավուշի մարզ, գ․ Այգեհովիտ, 16 տ․։ Խիզախ, ինքնուսուցվող, ակտիվ երեխա է, սիրում է կամավորություն, փորձել ամեն ինչ։ Ապագա իրավաբան է, ունի քննադատական մտածողություն։ Միայն հեռախոսով ակտիվությունների մասնակցելը արգելակում է նրա աճի բնական ներուժը։

Սաթենիկ Ալեքսանյան, Վայոց Ձորի մարզ, գ․ Խնձորուտ, 14 տ․։ Ակտիվ է համայնքային զարգացման, երիտասարդների աշխուժացման ծրագրերում իր գյուղի։ Շատ է սիրում սովորել, չի վախենում փորձել, սխալվել։ Սիրում է կիսվել իր ձեռք բերածով։ Միայն հեռախոսով ակտիվությունների մասնակցելը արգելակում է նրա աճի բնական ներուժը։

Աստղ Սահակյան, Գեղարքունիքի մարզ, 15 տ․։ Շատ է ցանկանում զարգանալ, փորձել, հարցնել։ Նախաձեռնողական է, սիրում է կամավորություն։ Սկզբում հեռախոս էլ չուներ, բայց մի կերպ գտնում էր հնարքներ հեռավար առաջադրանքներ անելու, հեռա��ար դասերի, հանդիպումների, վեբինարների մասնակցելու։ Հեռախոս ունենալով՝ այդ ցանկությունը ավելի է աճել, բայց արգելակվում է նոթբուք չունենալու հանգամանքով։

«Մարզերի երեխաները մարզերում» ՀԿ մասին

«Մարզերի երեխաները մարզերում» սոցիալ - կրթական ՀԿ է, որի միջոցով մարզերի երեխաները այցերով ծանոթանում են Հայաստանի տարածքին, շփվում և ընկերանում իրենց հասակակիցների հետ։ ՀԿ-ի շրջանակներում մարզեցիների համար ստեղծում են նաև բազմոլորտ գիտելիքների, հմտությունների, կապերի ստացման և այլ հնարավարություններ։

Նպատակները․

• նպաստել երեխաների աշխարհայացքի ընդլայնմանն ու կրթամակարդակի բարձրացմանը,
• նպաստել Հայաստանի զարգացման ապակենտրոնացմանը,
• օգտագործել Սփյուռքի ներուժն ու ամրապնդել կապերը։

Առկա կամ պոտենցիալ գործընկերներ և համագործակցողներ

«ԱՐՄԱԹ» ԻԼ ցանց, «Ուսանողի տուն» ՀԿ, «ՈՄԱ» ՌՀՀԿ, «Իրական դպրոց Վանաձոր», «Զարթնիր» ՀԿ, «Դասավանդիր Հայաստան» նախագիծ

Կոնտակտային անձ

Արամայիս Մարգարյան

Այս նախագիծն աջակցում է`

Կայուն Զարգացման Նպատակներին

«Ապագա Հայկանանը» Նպատակներին